Terra sen amos - Asociación de Amizade Galego-Cubana “Francisco Villamil" - Cubainformación.- En nome da Asociación de Amizade Galego-cubana Francisco Villamil, solicito cobertura informativa para o acto de presentación do libro conmerativo do XXX aniversario da nosa formación, titulado "TRES DÉCADAS DE GALIZA COA REVOLUCIÓN CUBANA", que se celebrará en Santiago o 29 de setembro ás 20 horas na libraría Pedreira (r/ Home Santo, 55).
Nel intervirán Xosé Neira Vilas, José Antonio Solana (Cónsul xeral da republica de Cuba), Gustavo Luca de Tena e Roi Casal.
Agardando a súa presenza no acto, reciba un cordial saúdo.
Valentín Alvite, presidente da Asociación Francisco Villamil
Teléfono: 626 12 01 19
BREVE RESEÑA DO LIBRO
Dentro dos actos conmemorativos do XXX aniversario da Asociación de Amizade Galego-cubana Francisco Villamil, terá lugar a presentación do libro anteriormente citado, que recolle a historia desta entidade. A actividade desenvolvida pola Francisco Villamil foi evolucionando no tempo. Iníciase a mediados dos oitenta, cando Cuba, vinculada ao COMECOM e á Unión Soviética, vive unha época de gran progreso económico e social, como reflite o Indice de Desenvolvemento Humano da ONU de 1990, que sitúa a Illa caribeña no posto 37 entre os países de desenvolvemento alto. Nesa época, a actividade da Villamil céntrase no ámbito cultural.
No inicio dos noventa, coa desaparición da URSS e do COMECOM, Cuba perde o 85% do seu comercio exterior e entra nunha grave crise económica. A Francisco Villamil deriva entón os seus esforzos cara á solidariedade material. No novo século, a aparición de diversos gobernos progresistas latinoamericanos e a creación de novas alianzas políticas, como a ALBA e a CELAC, comezan a mudar favorablemente a situación para Cuba. A actividade da asociación céntrase a partir de aí na divulgación de informacións sobre a Illa ocultadas polos grandes medios de comunicación.
Na elaboración do libro, participaron xornalistas, como Gustavo Luca de Tena; escritores, como Xosé Neiras Vilas ou Anxo Angueira (presidente da Fundación Rosalía de Castro), e diversos intelectuais cubanos, como o escritor Luis Toledo Sande ou o escultor René Negrín (autor da estatua de José Martí en Vigo), e algúns dos anteriores cónsules cubanos en Galicia, como María Sánchez ou Alejandro Fuentes.
Terra sen amos - Asociación de Amizade Galego-Cubana “Francisco Villamil"
WEB - http://www.terrasenamos.org
FACEBOOK - Terra sen Amos
TWITTER - @galegocubana