Como resultado do traballo de edición realizado para o libro, o ronsel de Fidel abroia en opinións espontáneas e abertas, cruzadas de agradecimento e emoción, recollidas en todo o pais e ordenadas á beira de artigos asinados por un escollido feixe de nomes do sindicalismo, a cultura, a representación política, o feminismo, a militancia nacionalista de esquerdas e o compromiso de fondo con Cuba.
O libro inclúe unha prolixa antoloxía do pensamento de Fidel escolmado no cumprido arquivo das súas intervencións, entrevistas, conversas, reflexións e artigos. Un amplo reconto do pensamento de Fidel sobre todas as materias que el considerou imprescindíbeis para construir a liberación do seu pobo e de todos os pobos do mundo.
A presentación será en Santiago mércores 19 de abril ás 20,00 na libraría Pedreira, rúa do Home Santo, 55 e a seguir en Vigo o día 25 martes, á mesma hora, na librería Andel, no 102 da Avenida Camelias.
A homenaxe a Fidel inclúe a edición e distribución do libro antes dun acto programado baixo o mesmo lema de Palabras Galegas para Fidel no Teatro Principal de Pontevedra para sábado 29 de abril ás 19,30.
O acto, presentado pola actriz Mónica Camaño, será de balde (ata completar aforo) e incluirá catro apartados: (interpretacións musicais, recitado de poemas, intervencións políticas e proxección de vídeos), contando coa participación das persoas que a seguir se indican.
POETAS: Anxo Angueira, Marta Dacosta, Pepe Cáccamo, Manolo Pipas, Celso Parada e Luz Fandiño.
MÚSICOS: Tino Baz, Mini e Mero, Uxía Senlle.
ORADORES: M. Anxo F. Lores (alcalde de Pontevedra), J. A. Solana (cónsul de Cuba), Willy Toledo (actor e activista) e Valentín Alvite (presidente da Asoc. Francisco Villamil)
Agardamos contar coa vosa presenza e activa colaboración na difusión desta homenaxe.
Vémonos en Pontevedra.
VIVA FIDEL!