Cubainformación.- O 26 de xullo conmemorouse en Vigo, o aniversario do asalto aos cuarteis Moncada en Santiago de Cuba e Céspedes en Baiamo. No acto incidiuse sobre todo na necesidade de rachar co bloqueo e da solidariedade internacionalista, subliñando como Cuba tamén a practica.

O acto foi conducido por Luisa Cuevas Raposo, da Asociación de Amizade Galego-Cubana Francisco Villamil, e iniciouse co himno cubano.

Tomou a palabra en primeiro lugar Erea del Río Iglesias, presidenta da Asociación.

 A seguir, a Consul Xeral da República de Cuba na Galiza, Ingrid Izquierdo Sterling.

Para finalizar leeuse o manifesto subscrito por diversas organizacións (1) e as compañeiras Laura e Marina Quintillan, tocaron o himno galego.

Aproveitouse para vender azucre e café cubanos, libros sobre Francisco Villamil e outros editados pola Asociación, informar das campañas que estamos a desenvolver e facer socias.

(1) MANIFESTO DE SOLIDARIEDADE COA REVOLUCIÓN CUBANA, NO 71º ANIVERSARIO DO ASALTO AOS CUARTEIS MONCADA E CARLOS MANUEL DE CÉSPEDES:
GALIZA CON CUBA, CONTRA O BLOQUEO E A AGRESIÓN IMPERIALISTA DOS ESTADOS UNIDOS.

Respondendo ao chamado da Asociación de Amizade Galego-Cubana “Francisco Villamil”, as organizacións políticas, sindicais e sociais de diverso carácter que subscribimos este Manifesto:

Saudamos un ano máis o pobo cubano neste 26 de Xullo, no seu Día da Rebeldía Nacional, en que conmemora o 71º Aniversario da xesta heroica na que unhas ducias de mozos e mozas liderados por Fidel Castro, emprenderon o asalto aos cuarteis do exército da ditadura de Batista, o Moncada en Santiago de Cuba e o Carlos Manuel de Céspedes en Bayamo, abrindo o camiño revolucionario cara á independencia real e o socialismo.
Denunciamos e condenamos o bloqueo económico, comercial e financeiro decretado contra Cuba pola Casa Branca, que se mantén dende hai 63 anos como eixo central da política dos Estados Unidos para a illa, malia o rexeitamento repetido, ano tras ano, pola Asemblea Xeral das Nacións Unidas.

Rexeitamos o réxime de sancións arbitrarias e ilegais, e a extraterritorialidade de normas xurídicas que impón Estados Unidos ao resto de países servís, como os da Unión Europea, en renuncia fragrante da súa propia soberanía, e saudamos a sentenza condenatoria expresada en novembro de 2023 polo Tribunal Internacional contra o Bloqueo a Cuba celebrado en Bruxelas no Parlamento Europeo.

Rexeitamos a inclusión de Cuba nunha arbitraria listaxe de “estados patrocinadores do terrorismo” que Estados Unidos e os seus lacaios teñen establecido, e consideramos inaceptable que países que invadiron, bombardearon, colonizaron e deron golpes de Estado en ducias de países nos cinco continentes se abroguen o dereito de expedir “certificados de boa conduta democrática” a ninguén. Queremos a Cuba fóra desa lista, xa!!

Reclamamos a devolución dos territorios cubanos ocupados ilegalmente por Estados Unidos na baía de Guantánamo, o peche do infame campo de concentración e torturas alí establecido pola CIA e da base militar norteamericana.

Finalmente, chamamos o pobo galego a seguir expresando a súa solidariedade activa con Cuba.
Até a vitoria, sempre!

En Vigo, Galiza, o 26 de xullo de 2024.

Asinan:

Asociación de Amizade Galego-Cubana “Francisco Villamil” e as organizacións seguintes:
Agora Galiza – Unidade Popular
Agrupación Xosé Velo
Asemblea Republicana de Vigo
Asociación Galego-Bolivariana Hugo Chávez
Bloque Nacionalista Galego
Central Unitaria de Traballadoras
Confederación Intersindical Galega
Esquerda Unida de Vigo
Galiza Nova
Mar de lumes – Comité Galego de Solidariedade Internacionalista
Partido Comunista de Galicia
Partido Comunista do Povo Galego
Partido Comunista dos Traballadores de Galiza
Partido Comunista pola República Galega
Unión do Povo Galego